.:::يبه وينك ؟؟ .... ولهــت لنظره من عينك .:::.

& أميرة الريآض..!& · 08-05-2008, 02:54 AM

يبه وينك ؟؟ .... ولهــت لنظره من عينك ....

يبه وينك ؟؟

أشوفه طوّل غيابك !! ... و من ودّاك .... ما جابك !!

قالوا ما يدوم الزين !! ... و أنا عندي آمل للحين ..

و لاكنّي أعرفك وين !!

يبه وينك ؟؟

عسى الداعي يبه بس خير ؟!!

عساك بخير .... مداين تكرم لعينك ...

بس أرجوك علمني ...

علمني .. يبه وينك ؟؟

سألت أمي عن رجوعـك ... ولا كنّي أعرفك وين !!

و قالت .. ما يدوم الزين !! ... و أنا .. عندي أمل للحين ..

في رجوعك !! .... يبه بس تكفى علمني ....

متى رجوعك ؟؟ .... يبه بس تكفى علمني .

وش أحلى من طلوع اثنين ؟؟

طلوع الشمس .... و طلوعك

يبه وينك ؟؟

سألت أمي ...... غيابك طال ؟؟

ولاكنّي أعرفك وين !!

و قالت مثل ما قالت .. حسافه ...

ما يدوم الزين ... مع كل هذا صدقني .. أنا عندي أمل للحين !!

سؤالي عنك يالوالد .. صار كما الموال

و اشوفه طال ... والله طال ..

حزين .. بلحـنه و حروفه ... يخاف .. يموت من خوفه ... و قلب ٍ كان أقوى قلب ... ضعف .. من قسوة ظروفه ..

يبه ..

أرجوك علمني ...

تشوف اللي أنا اشوفه ؟؟

أنا اشوفك نهار و ليل ...

في وسط المجلس تصلي .. و تدعي الرب ييسر لي ..

يبه ..

ما عاد بي من حيل .. وين الحيل ؟؟

و أنا اشوفك نهار و ليل .. مع اني ادري ما ترجع !!

غريبة .. بعدها تدمع .. عيوني من هموم البين !! .... و ادريبه مكانك وين !! ... مع َ هذا .. أرد و اسأل !!

يبه .... وينك ؟؟

و لاكني أعرفك وين !! شبكت العشر في غيابك ... على راس ٍ كساه الشيب .. و من وداك ... ما جابك ..

و لا ادري وش يخبي الغيب !! ... و جرح ٍ عذ ّب أحبابك .... يبه ..عيّا يخـف و يطيب !!

يبه.. كل جرح في الدنيا .. مصيره بالدوا يلتم ... و لكن البلا من جرح ..

نزف فرقاك ... بليّا دم !! ... و هذا الفرق في جرحي ... عجز يلقا الدوا دكتور .. أنا جرحـي غريب الطور !!!

ينزف ... بس بليّا دم .. و زاد الهم فوق الهم ... و دام انك يبه غايب ... جروح الغيبه ما تـلتم ..

بس عندي أمل للحين !! ... و لكنّي أعرفك وين !!

يبه .. ذكراك تفرحني ....

في نفس الوقت تجرحني !! ... لا من جبت في طاريك ... دموعي غصب تفضحني ....

يبه .. تذكر ليالي الصيف ؟؟

عرس الحي .. و رقص السيف ؟؟

و كرم قلبك معَ هـالناس .. كل ٍ كان في بيتك ضيف ..

ألا يا حيف .... ألا يا حيف ..

زمن قاسي .. زمن قاسي ...

اخذ مني بلا رحمه ... اخذ مني اعز ناسـي !!

و خلاّ لي سهر هالليل .. في عيني ضيف .. ألا يا حيف !!

يبه وينك ؟؟

تعال و شوف ...

كبرنا مثل ما تمنيت ... درسنا كل ما حبيت .. نصلي مثل ما وصيت .. و ندعي لك في كل ظروف ..

يبه وينك ؟؟

تعال و شوف .. صحيح الدنيا ما ترحم ..

تجرعنا التعب أنواع ... و لكن الأمل ما ضاع ..

و أنا عندي أمل للحين !! ... و لاكني أعرفك وين !!

يبه تذكر شطـانـتـنا ؟؟

أنا و أخواني و اخواتي ... معانا عيال حارتنا ..

نلعب في زوايا البيت .. يبه ... والله أنا حـنيت ..

لذاك الوقت في وجودك ... ألا يا ريت ... ألا يا ريت ...

ترجع .. يا يبه حـنيت ..

حسافه الدنيا ما ترحم ...

خذت منا سعادتنا ... خذتك بعيد .. و خلتنا !!!

يبه أمي تذّكرنا ... بأيامــك قبل ما تروح ... تناديها.. يا روح الروح ..

تغازلها و تنظر لك .. مثل طفله ... ملامحها عشق مفضوح ...

في ذاك الوقت .. كنا صغار ...

معَ هذا ... كنا نغار ..

عليها .. أو بعد منها ... كنا نغار

نحبك يا يبه ... ارجع .. مثل شمس الفجر .. اطلع

حزينه الشمس في غيابك .. و نفس الحزن في أحبابك .. أخاف الشمس من حزني ..

تغيب و ما بعد تطلع !! .. يبه ارجع !! ... إذا لي خاطر فـ قلبك ..

تعال و زورنا بس يوم ... مع انه ما يكفينا .. نشوفك يوم .. نبي حـضــنك يدفينا .. و نشوفك دوم ..

لكن قلّت الحيــلــة ... و يمكن مـ البطـا ضاعت ..
و قلنا يوم !!

يبه سامحني بترخّـص ... قبل ينشـف حبر الأقلام .. كلامي بعده ما خـلّص ..

و لكن موعد الأحلام .. حان ..

ولازم أوفي له.. بعد ما ضاعت الحيلـة .. أشوفك والوعد باكر !!

يبه شلونك ؟
إذا فكّر يجـي باكر ..!! .. و برجع أســألـــك وينك !!

بس لازم تجاوبني .. ترى عندي أمل للحـــين !! .. و لاكنّي أعرفك وين ..!!

ملل هالكون من دونك. ..

يبه شلونك ؟
وتمضي رحلة الدنيا ... بليا طـــلة عيونك

يبه شلونك ؟
وشلون المرض وياك ؟ ... بعد ما هدك بدنياك ... عساها تغمض جفونك ؟
تبي تدري عن أحبابك ؟ ... عن عيون تغنا بك ؟ ... عن قلوب دفنها الشوق ...واذا جاها الغ

.:::يبه وينك ؟؟ .... ولهــت لنظره من عينك .:::.

همس الخواطر