~?!{ انــ\\ـــا لغيرك وانتي لغيري }!?~

& أميرة الريآض..!& · 02-06-2008, 01:58 PM

ادري مقصر معاك وفـي محبتنـا
وادري ماتدرين ليه اسباب تقصيري

لو دام حبك ولـو دامـت علاقتنـا
انا لغيرك ياقلبـي وانتـي لغيـري

لازم نقّوي على الفرقـى عزيمتنـا
لو كان بعدك سبب همي وتدميـري

عجزت لا ادبر اظـروف ٍ تحدتنـا
ماقام حظـي ولا فـادت تدابيـري

المجتمع والعوايد غصـب حدتنـا !
وإلا انتي اصلاً زيادة خير في خيري

ولو إن قربك خطا يابيـض رايتنـا
يزيد قدرك غلا مـن زود تقديـري

مادنسك كـذب حاسدنـا وشامتنـا
تبقين ورد العفاف ان زان تفسيري

لكن عزانا على الذكـرى وضيقتنـا
هذي حقيقه ولا داعـي لتبريـري

ياغايتـي يـوم تنهينـا نهايتـنـا
تعالي اخذي من اوجاعي تعابيـري

انا وشعري وصلنـا فـوق طاقتنـا
احزن وحزني يحبونـه جماهيـري

وفيت وانتي وفيتـي ميـر خانتنـا
كـل التفاكيـر واولهـا تفاكيـري

واليوم ندفـن بقايـا حـي ميتنـا
ماعاد تحيـيّ معاذيـرك معاذيـري

بعيش في سكـة الذكـرى بدايتنـا
واسير لحلامنا وانتي بعـد سيـري

تذكرينـي بيـاض ٍ سـاد نيتـنـا
تذكريني ولا يألمـك .... تأثيـري

تذكرينـي وعيشـي فـي محبتنـا
تذكرينـي فهـد صنهـات المطيـري

مع السلامه خلص واقـع حكايتنـا
انا لغيرك ياقلبـي وانتـي لغيـري

وصلت لا خر محطه في مسيرتنـا
تطّول مشاويرك او تقصر مشاويري