The First Round .. In Ur Eyes

بسم الله الرحمن الرحيم

سلام .. بعد نهايه الجوله الاولى وكل المنتخبات لعبت متش واحد ..
هذا تقولون زبده اللي صار بوجهه نظري الشخصيه .. مدري عنكم .. هذا رايي الشخصي ..
ارائكم انتو .. ؟! .. تتفقون معي .. تختلفون معي .. في وش وليش .. ؟! ..

طبعا موضوع ع السريع .. محناب داخلين في تفاصيل و تكتيكات وحوسه .. المساله نقاط سريعه وراي .. اي واحد يختلف معي ياخذ راحته ..
وكان الموضوع فيه تفاعل نصير نحطه كل جوله مرجع لنا بعد اليورو ان شاء الله <<


،،،


احسن فريق ..



بالنسبه لي .. في هالبطوله لين الحين ثلاث فرق هي اللي فازت بمستوى ونتيجه مستحقه .. البرتغال و هولندا و اسبانيا .. البرتغال .. مع انها احسن من تركيا حتى في المستوى و بمراحل ..
لكن مع كذا لين الحين موب هذا مستواها الصدقي و الاقوى .. لعبت عشان تفوز باقل مجهود .. عشان كذا نستبعدها .. هولندا و اسبانيا .. كلهم فازوا بنتايج جامده ..
وادوا اداء بن كلب .. ميزه هولندا ع اسبانيا انها فازت ع بطل العالم .. ايطاليا .. بينما فازت اسبانيا ع روسيا مع هيدينك ..
لكن برضو .. ارشح اسبانيا .. هولندا مع انها فازت .. لكن وضح ان دفاعها ضعيف .. مشت معها الكوره .. .. " بيشوتني رابح .. " .. بينما اسبانيا ادت ولعبت ولافيه نقاط ضعف واضحه ..
عشان كذا اقول اسبانيا ..


،،،


احسن لاعب ..



خذت احسن لاعب في كل مباراه .. في النهايه برضو وقفت المنافسه بين ثلاثه نفس المنتخبات اللي فوق .. بيبي .. شنايدر .. و فيا .. ومعهم بودولسكي ..
بيبي .. مدافع .. جاب قول .. وغير كذا .. صلب دفاعيا .. ما بقى كوره ما خلصها .. سيطر ع الدفاع بشكل كامل ..
شنايدر .. جاب قول و صلح قول .. ولعب في كل مكان في الملعب .. كان اهم سبب في فوز منتخبه .. فيا .. هاتريك اتوقع يكفي عن الكلام ..!
بودولسكي .. قولين منتخبه جابهم .. ممممم .. ابقول فيا .. لغه الارقام .. !


،،،


احسن هدف ..



المتنافسين هنا كانوا واجد .. هدف ابراهيموفيش امس .. هدف موراليس و سحبه موتينيو .. مزعه بودولسكي .. اهداف فيا امس .. لكن وجهه نظري احلى هدف هدف شنايدر ..
الهدف اولا ع بوفون ..! ثانيا شف الطقطقه .. كوره تتخلص من خط المرمى .. يطلع فيها جيو مسافه .. يعرضها موب للاعب اللي جوا المنطقه للبعيد كويت ..
اللي يلعبها براسه لشنايدر .. حطها بطريقه رااايقه في الباب .. هدف فيه كل شي .. السرعه الطقطقه المتعه الجمال .. عشان كذا اخترته ..


،،،


احسن مدرب ..



سكولاري .. منتخبه فاز 2-0 اداء ونتيجه .. فان باستن .. فاز ع ابطال العالم 3 - 0 مستوى ونتيجه .. اراغونيس سوا توليفه بنت كلب صقعت فريق هيدينك باربعه .. هالثلاثه كانوا الابرز مع منتخباتهم ..
وجهه نظري .. فان باستن يستاهلها .. فريقه كاسماء ما يقارن بايطاليا ولا اسبانيا ولا البرتغال .. لاعبين مستبعدين بالهبل .. اصابات قصت ظهره .. كل الظروف ضده ..
وتطلع بهالفوز وبهالنتيجه ضد بطل العالم .. يستاهل الصفقه اكيد .. عشان كذا ارشحه ..


،،،


احسن موهبه ..



فيه مودريتش .. اللي ما كان قد الطموحات .. فيه سفيركوس .. البديل اللي عمره 19 سنه وجاب قول في اول مباراه مهمه له مع المنتخب ..
بن زيمه و نصري ومستواهم الباهت ..مافيه احد يستاهلها غير صديقي لحالي " زرفه " موتينيو .. ..
اول مباراه بهالحجم .. اداء عالي .. استلام و تسليم و اختراق .. يقطع كور مع جسمه الضعيف .. لكنه يلعب بمخ .. .. ثرواته رااايقه ..
خطف كل الاضواء من كل الشباب في البطوله .. وجا الهدف اللي صلحه في الاخير ع الطريقه الزيدانيه عشان يحكي .. .. ما اتوقع يستاهلها غيره ..


،،،


احسن صده ..



هذي عاد مافيها اي مناازع .. المنتخب الايطالي مضغوط .. ،فاول .. ويتقدم بيرلو .. يحطها حطاته ..
مافيه امل تنصد خلاص رايحه الباب .. ويطلع لك ابوساره ويطلعها من حلق المرمى .. ع قوله الطيب عباس بن فرناس ..!
ارتداد وقول .. صده ميب طبيعيه .. يستاهل ابو ساره ..


،،،


اطلق مباراه ..



شخصيا .. اكثر مباراه عجبتني وفيها حماس مباراه ايطاليا و هولندا .. صحيح مباراه البرتغال حليوه .. واسبانيا بدعوا ..
لكن مباراه هولندا كانت راايقه .. هجمات من بدايه المباراه للطرفين واهداف و اثاره واكشن و فله .. تستاهل احسن مباراه ..!


،،،


اكثر منتخب جاب العيد ..



مافيها اي كلام .. ابطال العالم .. ايطاليا .. صحيح منتخبات كثيره خسرت .. لكن المنتخب الوحيد الكبير تقريبا للي خسر ايطاليا ..
ومو بس كذا .. بالثلاثه .. وبمستوى سيء جدا .. لا وهم داخلين بهيط انهم ابطال العالم ..
يستاهلون بقوه اكثر منتخب جاب العيد ..!

،،،


اكبر زلابه ..



هنا اتكلم عن المدربين .. مافيها كلام برضو ،، دونادوني ..!
بهالاسماء اللي عندك .. واللاعبين اللي عندك .. وهالسمعه البطله .. وتخسر هالخساره وبهالاخطاء البدائيه و التنظيم السيء .. ما يبيلها كلام ..
بتقولي غايب كانا .. ابقولك شف غيابات فان باستن اولا .. ثانيا تراك ايطاليا .. المفروض مهما صار ..
تبقى ع الاقل اسم المنتخب يلعب فيه وسمعته ..!


،،،


العن خطا حكم ..



هنا مدري .. فيه بلنتي كرواتيا بالنسبه لي فيه شك .. فيه بلنتيات لسويسرا ع اوجفالوسي ما انحسبت .. فيه قول البرتغال اللي ما انحسب فيه شك ..
هالاخطاء اعتقد اكثر اخطاء غيرت مجيرات المباريات .. بس اتوقع في النهايه بلنتي كراوتيا يستاهل العن خطا .. جاب فوز لفريق ما يستاهل ..!


،،،


امصل مباراه ..



فرنسا رومانيا .. فرنسا رومانيا .. فرنسا رومانيا .. فرنسا رومانيا .. فرنسا رومانيا .. فرنسا رومانيا .. او فرنسا رومانيا .. طيب يمكن فرنسا رومانيا ..
مافيه كلام .. اكيد فرنسا رومانيا ..


،،،


انحس فريق ..



بالنسبه لي ما اشوف انحس من سويسرا .. مستضيف .. وبطوله العمر .. وتلعب مباراه العمر في الافتتاح ..
تفت وتحجر الفريق الثاني .. وانواع الفرص و الهجمات .. واخرتها يجيبون قول ويطلعو ن بفوز غير مستحق .. سواء مستوى .. او اخطاء حكام .. وقدام جمهورك .. شينه ..!
لا واصيب كابتنهم وافضل لاعب فيهم اصابه طلعته برا البطوله ..!
النمسا برضو منحوسين .. بدعوا .. بس ما يقارنون بسويسرا .. اللي تستاهل بجداره انحس فريق ..!


،،،


انحس حكم ..



حكم مباراه الافتتاح .. التشيك و سويسرا .. اتوقع يستاهلها بالراحه ..
بلنتيين ع اوجفالوسي .. واحد واضح وضوح الشمس .. اللقطه الثانيه اللي اتوقع خلته ياخذها بدون اي كلام ..
لقطه للاعب سويسري .. شد لاعب تشيكي .. دفه .. عطاه بوقس .. جا الحكم طاير وحط يده ورا في الجيب بيعطيه اصفر ..
يوم تذكر انه معه اصفر .. معناته طرد .. واللاعب سويسري و المباراه في سويسرا .. خاف يخسر الجمهور السويسري وهون ولاعطاه حتى كرت .. !!
مع ان اللقطه تستاهل بلحالها احمر .. اشوف هالحكم يستاهل وبقوه ..!


،،،


هذا رايي الشخصي بالنسبه للجوله الاولى .. كلن ورايه حر ..
تختلف معي في اي نقطه عندك تعقيب اضافه اي شي .. حياكم الله الموضوع موضوعكم حط لك رد وقل اللي تبي ..

يعطيك العافية غرك زمانك ..

لي عودة للإجابات ..