في قديم الزمان كنت مدرسة مافيها الا الدشير و السلنتح .. كنت الله يسلمكم في الصف الاول وكنت دايم متكتف وساكت مسوي تراني مؤدب .. عاد مع الجو تأثرت بالدشره
.. صرت بدل الاول صرت في الزاويه وكنت بعد اخلي الكرسي يتدودل على الجدار .. وفي يوم من الايام جا مدرس حق التفسير الظاهر وكان هذا نشبه ولزقه .. مافيه احد
بالمدرسه مايكرهه كان يصعب الاختبارات عشان كذا محد يحبه .. المهم كنت ماحليت الواجب في يوم من الايام طبعا هذي مهيب اول مره .. جا هالمدرس وقال ليش ماحليت الواجب ؟ .. استغربت انا وقلت : يعني هذي اول مره ما احل الواجب !! .. مار يجي وعيونه تتطاير بالشرار ( اعصابك يانجيب محفوظ ) .. ويصطرني بهاك الكف اللي ماعاد صرت ادلّ وجه الاستاذ .. قال يالله رح الوكيل !! .. جيت با اطلع واشرت بيدي بمعنى ( طيّب .. طيّب
) .. واروح الوكيل قال : تكفى فيه احد صطرك بكف وقال لك تعال ادرس ؟ .. قلت : لا ! .. قال : اجل وشوله تجي ؟ .. قلت : تبي ابوي يذبحني ؟ والله لو ما اروح المدرسه كان يوديني على اقرب طياره لجزر الواق واق .. قال : طيب يالله انقلع فصلك !! .. قلت : شكرا استاذ .. ما امداني اوصل الفصل الا والجرس رنّ قلت فكّه ولا كان رجليني بتتشنج .. عاد قعدوا اخوياي يريشوني بالفسحه وحدث هالحوار التالي :
سعود : والله انه بحق هالكف !!
فيصل : والله لو كنت مكانك كان اشتكيه لهيئة الامم المتحده !!
انا : فيصل من جبت هالكلمه ؟
فيصل : سمعتها من الرادو
انا : والله اني داري ان ماعندك الا الدجه
نايف ( وهو توه داخل علينا ) : وااااااااع عطاااك كف بن كلب ! .. شف خدودك كنها طماط منتهي
انا : تصدق عقب هالكف احس انه بأنفضح بهالمدرسه وينشبون لي الطلاب !!
سعود : اقولك والله انها بحق ولازم ترد له هالحركه !!
انا : طيب وش اسوي له عشان اقدر ارد عليه هالكف ؟
فيصل ( وهو يسولف لفواز وانا وسعود قاعدين نسمع وش يقول ) : امس شفت فيلم والله انه بطل , تخيل واحد سوا للثاني فضيحه واشتهرت في المدينه , وجا الاول وفضحه بفضيحه اقوى منها !!
فواز : وشلون ؟؟
فيصل : دخل على مكتبه وجاب اوراق تدل انه سراق وحرامي وقدر يفضحه بالمدينه !
انا وسعود ناظرنا بعض : تهقى ؟
انا : ياشباااب عندنا اجتمااع في زاوية الساحه انتظركم هناك بعد خمس دقايق , ترى الموضوع مهم !
طلعنا انا وسعود وفي الطريق شفنا عصام : شو شبااب مابدكو فطاير !!
سعود : الحقنا في زاوية الساحه
وصلنا زاويه تكيت على البلكه , وقعدت وحضرت كل الشله ! ياشباب فيه حالة طوارئ عندنا ! .. انت خابرين المدرس بيفضحني بهالكف .. وانا لازم ارد عليه .. وقررت اننا يوم الخميس ندخل المدرسه ونحوس مكتبه ونجيب اي فضيحه له .. بس لازم الجميع يحضر تسمعون ؟
عصام : معليش شباب عندنا عرس ومابئدر احضر !
انا : ومن متى وحنا نستفيد منك تكفى !!
عصام : بيجي اليوم اللي بتستفيدون مني !
انا : ايه كثر منها
المهم اتفقنا على اننا يوم الخميس نقتحم المدرسه ونخربها ونمشي !! وفي يوم الخميس وبالتحديد قدام باب المدرسه وفي الساعه 12 الليل قعدت انا احتري العيال .. جوا كلهم وكل واحد معه عدته ..
ونرقى من فوق الباب ونطبّ .. وندخل على غرفة المدرسين طبعا كان الباب مسكر .. لكن ساعدتنا طرمبة فيصل كثييير .. دخلنا وقعدنا نحوووس اليين لقينا طاولة المدرس التافه .. وقعدنا نحوس في الدروج ..
فيصل : لقيت شيء !!
حنا ( باستغراب و تلهف ) : وش لقيت ؟
فيصل : لقيت القلم حق الاستاذ
انا : فيصل محد قد صطرك بكف على جبهك ؟
المهم تابعنا البحث .. سمعنا صوت طرق اقدام تقرقع على الارض ( يسمع بالفصحى ) .. توزينا تحت الطاوله ونسمع الباب ينفتح ! .. ويطل فيصل من فوق ويطلع من تحت الطاوله ويقول : هلا موديييير !! .. حنا استغربنا نحسبه المدير قعدنا نسحب ثوبه نقول له : انزل انزل لاتفضحنا !! .. قال : وش فيكم ياعيال ؟ هذا مودير حارس المدرسه ! .. ونطلع ونناظر الا هو الحارس قال : ليش انتا نفر هنا ؟ قلنا : حنا من يوم الاربعاء وحنا هنا صكيتوا علينا الباب وندور احد يطلعنا والحمدلله انت جيت عندنا .. قال : طيب يالله سوي اطلع انا في سوي تنظيف مدرسه عشان يوم سبت ! قلنا : يالله بنطلع !! .. وحنا طلعنا صدق نخاف انه يعلم ولاشي .. ونطب من فوق السور واناظر ولا اشوف اللي ماتوقعت انا اشوفه ولا تمنيت انا تصير عيني بعينه في هاللحظه بالذات كان آخر توقعاتي اني اشوفه .. تدرون من شفت ؟ شفت ابـــوي .. ويسمكني مع يدي ويرعصها ذيك الرعصه اللي شوي ويطلع العظم من قوتها .. قال ( بإبتسامه ) : وش قاعدين تزينون ؟ .. قلت : ابد سعود كان عنده عمل وكان لازم يعطيه الاستاذ يوم الاربعاء لكنه نسى يعطيه مالقينا حل الا اننا نجي للمدرسه ونحطها ونعوّد !! .. قال : طيب يالله اركبوا اوصلكم .. وصل العيال وكان مبتسم وفجأه انقلب الابتسامه الى تكشيره .. ويناظرني ويقول : مهند وش انتي مسوي ؟
.. قلت : اللي قلته لك ! .. قال : نشوف يوم السبـــت !!! .
وفي يوم السبت جا ابوي للمدرسه ودرا عني وكل سواتي !! .. وتوعدني في المدرسه انه بيجلدني في البيت .. والمدير جلدني علني قدام الطلاب ! تراه ماطقني واجد يمكن 10 او 15 او يمكن اقل .. وفي البيت اشوف ابوي جا عندي وانا راقد في السرير وهو يقول :
يالله ناصرا قم وراك جامعه ياتبن !!
لعبت عليكم .. طلع حلم لاتحمسون
مايستفــــاد / 1. لاعاد تقرا شيء لـ ناصر مره ثانيه ابد
2. لاتصير داشر مره ولا دافور مره خلك نص و نص .. يعني داشور
3. لاتهايطون على المدرسين .. ولا ترى يجيك بوز على خشتك
أنت غير مسجل في منتديات العاب العب. للتسجيل الرجاء اضغط هنـا 
ايام المدارس هههههههه 
.gif)
